Ex oriente lux

Dos grands Provençaus an marcat l’espaci occitan d’una emprenta indelebila : Mistral e Lafònt. Totei dos an agut la mema ambicien : afortir l’unitat d’una lenga e de sa tèrra em’aquelei que si nen sènton responsables, en resistènci contra aquelei que l’an vòuguda espòutir m’un encanhament qu’a jamai plegat jusc’a vuei. Degun autre a portat aqueu prefach m’una pariera teneson e m’una tala fortuna.

Coma tota causa generosa, la nòstra a agut de lònga autant d’enemics dau defòra que dau dedins. Coma tot projèt uman, sei bailes coma seis òubriers an pas escapat ais erranças e ai contradiciens. Mai s’es jamai rompuda la fidelitat a l’esperança promiera qu’an incarnat sei mèstres.

Anam començar de celebrar a la data de sa naissènça lo 16 de març lo centenari de Robèrt Lafònt. Lo Païs d’Oc a travessat bèn d’auvaris de lòng de son istòri, e la periòda de vuei n’es pas franca.

Lo sòrt a esparnhat a Lafònt d’èstre temoin de l’imperdonable malordit qu’a enfrominat lo nom meme de l’Occitania mé la complicitat dau poder francés en nen garçant defòra lei dos tiers de son pòple. Mai una vitòri deis espeçaires de l’ideau dau mistralisme coma de l’occitanisme, lo ratum que roiga nòstre comun mé testardisa despuei tant de tèmps.

Pasmens nautrei tambèn siam testards e avèm aprés a faire targa. Coma s’es escrich a la torre de Costança dins la lenga de Calvin e dins una òucasien autrament dramatica, resistir es au còr de nòstra condicien. Enaurar l’imense eiretagi de Robèrt Lafònt serà pèr totei un biais de si faire espala entre nautrei e d’empurar nòstra vòlha.

En Provènça e as Ais sa capitala istorica, es aquì meme monte Mistral a fach seis estudis que dèu si debanar l’òumàgi a Robèrt Lafònt. Revenié naturalament a l’Institut d’Estudis Occitans de nen prendre lo govèrn, e de recampar a son entorn lo movament occitanista dins son ensèmble, e mai en li convidant lo movamen mistralenc pèr contunhar lo camin comun monte lei dos bessons de la resistènci provençala si son endraiats mai que mai despuei la creacien dau Forum d’Oc.

L’engajament politique, qu’es estat una composanta fonsa de la demarcha de Lafònt, li aurà tota sa plaça, mé tot naturalament aquela dau Partit Occitan.

Alan Barthélemy-Vigouroux